ألتمس العذر عزيزنا القارئ لأن المقال دسم قليلا خاصة ونحن نتحدث عن عنصر بحجم وأهمية عنصر الكالسيوم
عنصر الكالسيوم نقدر نقول عليه هو (أسمنت النبات) وتوصيفي ليه ابن الأكابر
وخلونا نشوف دا مع بعض ……..
توصيف الكالسيوم فى علم التغذية هو عنصر من العناصر الكبرى بل من أهم العناصر المظلومه فى الحديث عنها ، بس مشكلتك إنه عايز سواق يسوق بيه علشان يدخل داخل النبات ، وهو عنصر بطيء الحركة في الأوعية الخشبية (من خلال الجذر) ، وفي رواية تانية عديم الحركة وخاصة لو تحدثنا عن أوعية اللحاء (الحركة من خلال الأوراق) .
الكالسيوم عبارة عن (الأسمنت) بتاع النبات .. أيوه ، لأنه ببساطة هو المسئول عن بناء الجدار الخلوى يعنى نبات وثمرة قوية .. ودا معناه إنه بيعمل على زيادة مناعة النبات ضد الأمراض الفطرية والحشرية ومش كده وبس ، كفاية اننا نعرف إن وسيلة حماية لنبات أحيانا ضد الحيوانات والطيور أيضا حيث يدخل مع الأوكسلات في تصنيع أشواك لحماية النباتات الصحراوية.
السؤال إزاى دا بيحصل ؟؟؟
يدخل الكالسيوم فى تركيب هيكل النسيج الداخلى ، حيث يدخل فى تركيب بكتات الكالسيوم الذي يكون الصفيحة الوسطى التى ترتبط بين الخلايا ودي نقدر نقول عليها خط الدفاع الأول إن صح التعبير فى علم الأمراض والوقاية “حيث يصعب على الفطر أو الحشرات الثاقبة الماصه (المن – التربس – ذبابة الفاكهة …….) ، بالاضافة إنه بيلعب دور كبير جداً فى تخزين الثمار وزيادة ما يعرف
بـــ Shelf life (زيادة فترة بقاء الثمرة بحالتها الصحية بعد القطف) ، وفى كتير من الأبحاث بتثبت إن الكالسيوم بينظم درجة حموضة الخلايا وهو المسئول عن التوازن بين”الناقل” البوتاسيوم و”سئ السمعة ” الصوديوم داخل الخلية النباتية ،
بل والبعض الأخر ذهب إلى أن الكالسيوم مسئول عن نقل الإشارات العصبية داخل النبات.
و بقليل من التركيز فى الجزئية دى .. الكالسيوم عنصر يكاد يكون عديم الحركة علشان كده لازم حاجه تساعده للدخول داخل النبات ، وبيكون إما عن طريق التربة علشان كدا دايماً بيكون المنتج فى صورة نترات كالسيوم (دور النترات هنا دخول الكالسيوم داخل النبات حيث يحمله معه الى داخل النبات) ، لأنه مش بيتحرك لوحده لازم حاجه تساعده على الحركة .
و إما عن طريق الرش الورقي في الأعم الأغلب يكون معاه بورن ، ودا لأن البورن بيحرك الكالسيوم مع إن البورن هو كمان غير متحرك والفكرة إن البورن هو المسئول عن حركة الأوكسينات؛ والأوكسينات هى اللى بتحرك الكالسيوم ودا سبب اننا بنضيف الــ الجابلس مع الكالسيوم ودا لانه بيحتوى على نسبة من الأوكسين الطبيعى و هكذا .
الكالسيوم له دور كبير فى تقليل تساقط الثمار وزيادة الوزن ودة حاجه اعتقد ان كلنا محتاجين لها وخصوصا السنة دي اللى فيها قلة أوزان بشكل غير طبيعي.
ومن المعروف إن الكالسيوم مهم جدا فى طرد الملوحة ، والفكرة سريعاً هي أن الملوحة هى زيادة نسبة الصوديوم في التربة؛ و وجود الكالسيوم بكميات مناسبة أعلى من الصوديوم يوقف امتصاص الصوديوم ، ومن هنا تيجى فكرة إن كل معالجات الملوحة شرط أساسي وجود عنصر الكالسيوم.
أما بالنسبة للتوصيات ، يفضل عدم خلط الكالسيوم فى التربة إلا مع (شق نتراتي، وحامض النيتريك) حتى لايفسد التركيب بالخلط .
معلومة على الهامش
الــــ بروتكت بلس أحد الأدوات الهامة للمعاملة الورقية في يد المزارع لإمداد النبات بعنصر الكالسيوم وهو موجود في صورة فريدة تتميز بإعطاء النبات عنصر الكالسيوم في صورة غذائية ، بالإضافة إلى صورة أخرى تحمي النبات من الإصابات الفطرية الخطيرة التي تهدد محصول العنب سواء كانت بياض دقيقي أو أعفان الثمار .
والي اللقاء مع معلومة تهمك ….
م / صدام مصطفى